Yeroo kolleejjii keessa turetti, yeroo jalqabaatiif bidiruu xiqqaa sharaa qabuun bishaan irra yeroon deemu, wantoonni hedduun na dinqisiisan. Geggeessaan keenya inni sodaa hin qabne sharaa bidirichaa gara tokkoo irraa gara kaaniitti ogummaadhaan sochoosaa, bidiricha ofitti amanamummaadhaan qajeelchee haroo Florida sana irra akka mucucaachisu arguun baayʼee na dinqisiise. Akkasumas, humna bubbeetiin qofa sochoʼaa utuu jirruu, saffisa guddaadhaan deemuun keenya baayʼee na gammachiise. Muuxannoon addaa kun waan Hafuurri Waaqayyoo jireenya amanaa tokkoon tokkoo keessatti gochuu barbaaduuf fakkeenya dinqisiisaa naaf taʼe. Inni aduu hoʼaa keessatti kaayyoo malee asii fi achi akka oofamnu nu hin dhiisu; kanaa mannaa, Hafuura isaa isa humna qabeessaan jireenya Kiristoosiin guutame akka jiraannuuf humna nuuf kenna.

Guutummaa Kiristoos Muuxachuu

Waaʼee Hafuura Qulqulluu barsiisuuf karaaleen garaagaraa jiru. Namoonni tokko tokko ilaalcha gubbaa irraa gadiitiin barsiisu. Isaan jalqabarratti “barumsa amantii olʼaanaa” dhiheessuudhaan yaad-rimeewwan tiʼooloojii kanneen akka Sillaasee qoratu. Warri kaan immoo mata-dureewwan jireenya amanaa wajjin kallattiidhaan walqabatan, kanneen akka “Hafuuraan Guutamuu,” irratti xiyyeeffatu. Kaayyoo lamaan kana ni dinqisiifanna. Haa taʼu malee, ilaalcha cimaa fi Kitaaba Qulqulluu irratti hundaaʼe waaʼee Hafuura Qulqulluu isiniif kennuu barbaanna. Kunis Hafuura Qulqulluu wajjin dhiʼeenyaan akka deddeebitanii fi hojii Isaa akka hojjettan isin gargaara.

Jireenya Hafuura Keessatti! mala gadi irraa gara gubbaatti guddatu fayyadama. Malli kun, muuxannoo guddachaa fi beekumsa ummanni Waaqayyoo jireenya Kiristaanaa isaanii keessatti waaʼee Hafuura Qulqulluu argachaa dhufan irratti hundaaʼuudhaan Isa nu beeksisa. Akkuma daaʼimni haaraan dhalate hubannaa isaa keessatti suuta-suuta guddatu, amantoonnis hubannaa fi muuxannoo Hafuura Qulqulluu keessatti ni guddatu. Barumsi tiʼooloojii hubannaa fi muuxannoo hafuuraa malee yoo baratame, balaa geessisuu dandaʼa. Kaayyoon keenya beekumsaa fi muuxannoo walitti fiduudha. Kunis Hafuura Qulqulluu wajjin wal-qunnamtii humna qabeessa taʼe uumuudhaan, jireenyaa fi tajaajila keenya keessatti hojii Isaa caalaatti akka muuxannu godha.

Dhugoonni barannu amantii garaa keenya qulqulleessuu fi miilli keenya karaa irraa akka hin gorrene nu eegu yoo hin uumin, faayidaan barumsa amantii maali? Nutis dhugoota Kitaaba Qulqulluu garaa keenya keessa gadi fageenyaan fudhachuu qabna; sana booda dhugoonni sun jireenya keenya irratti dhiibbaa gochuu dandaʼu.

Akkuma Yesuus Hafuuraan guutame, Waaqayyo amanaan hundi Hafuura Isaatiin akka guutamu akka barbaadu guutummaatti nan amana. Dhuguma, hojii fi itti gaafatamummaan keenya garaagara; garuu akkaataa jireenya keenya itti jiraannu keessatti amala Kiristoos mulʼisuun keenya wal-fakkaata. Hafuura Qulqulluun jireenya keenya guutummaatti akka itti fayyadamnuu fi karaa Yesuus fuula keenya dura kaaʼe amanamummaadhaan akka hordofnu nu haa gargaaru!

Odoolawwan Guddina Hafuuraa Afur

Michuun koo inni tiksee gaarii taʼe tokko kaartaa nuuf kenneera. Kaartaan kun hojii humna qabeessa Hafuura Qulqulluutiin, odoola tokko irraa gara odoola kan biraatti ceʼaa, fakkaattummaa Kiristoositti akkamitti guddachuu akka dandeenyu nu argisiisa:

• Odoola #1: Jalqaba Jireenya Kiristaanaa—Jireenyaa fi Amantii
• Odoola #2: Guddina Kiristaanaa—Jabinaa fi Of-dhiheessuu
• Odoola #3: Tajaajila Kiristaanaa—Amantii fi Hafuuraan Guutamuu
• Odoola #4: Barumsa Amantii Kiristaanaa—Gaaffiiwwanii fi Tiʼooloojii

“namni Hafuura irraa dhalate hundinuus akkanuma.” (Yohannis 3:8).

Kiristaanonni argamuu fi humna Hafuura Qulqulluu yeroo hunda akka muuxatanii fi, akkuma Yesuus, jireenya hafuuraa keessatti guddachuu fi tajaajiluuf yeroo hunda Isatti akka hirkataniif qophaaʼaniiru. Garuu Hafuurri Qulqulluun eenyu? Namni waaʼee Isaa akkamitti baratee Isatti hirkata? Inni amantoota akkamitti geggeessa? Isaan kun gaaffiiwwan murteessoo waggoota hedduudhaaf Kiristaanota rakkisaa turan keessaa muraasa. Jireenya Hafuura Keessatti! imala gammachiisaa waaʼee Hafuura Qulqulluu itti barannu keessa, odoola tokko irraa gara odoola kan biraatti, nu geggeessa. Kunis argamuu fi humna Hafuuraatiin yeroo hunda guutummaatti eebbifamnee akka deddeebinu nu gargaara.

Buufanni keenya inni jalqabaa gara odoola Jalqaba Jireenya Kiristaanaatti nu geessa; achitti jireenya haaraa amanaa fi amantii isaa isa jalqabaa qoranna. Amanaan haaraan hubannaa sirrii qabaatee yoo jalqabe, humna Hafuura Qulqulluutiin jireenya isaa haaraa Kiristoos keessatti tarkaanfii guddaa fuulduratti fudhachuu dandaʼa.

Boqonnaawwan Kitaabichaa