C. Ibiddadhaan Cuuphamuu

Bartoota Yesuus taʼuuf hojii Waaqayyoo isa guddaan nu keessatti raawwatamuu qaba. Yohannis Cuuphaan yeroo waaʼee keessa jiraachuu Hafuura Waaqayyoo fi ibiddaa dubbate kana akeeke (HoE 2:3). Nuti deebiʼanii dhalachuu qabna; jechuunis ogummaa fi humna uumamaa jiraataa Waaqayyootiin jireenya haaraa argachuu qabna.

“Yohannis akkana jedhee isaan hundaaf deebii kenne; “Ani bishaaniin isin cuupha. Garuu kan na caalaa jabaa taʼe tokko ni dhufa; ani hidhaa kophee isaa illee hiikuun naaf hin malu. Inni Hafuura Qulqulluu fi ibiddaan isin cuupha.” (Luqaas 3:16; Maatewos 3:11; Maarqos 1:8).

Yohannis namoota gara qalbii jijjiirrannaatti waamuuf bishaaniin cuuphe. Kun jireenya moofaa isaaniitiif duʼanii jireenya haaraa akka jiraataniif mallattoo ture. Ibidda kana amala isaa isa qulqulleessu wajjin walqabsiisuu qabna. Ibidda jechuun amansiisuu Hafuuraa fi qalbii jijjiirrannaa isa cuuphaadhaan fakkeeffamuun itti aanuutiin, ofii cubbamaa guutummaatti qulqulleessuu bakka buʼa (Roomaa 6:2–4; 1 Pheexiros 2:24).

Kutaan cuuphaa inni lammaffaan bishaan keessaa baʼuudhaan fakkeeffama. Kun dhalachuu haaraa, jireenya haaraa fi hojii Hafuuraa amanaa keessatti itti fufu irratti hirkachuu argisiisa; kanaaf jecha “jireenya hafuuraa” jedhuun ibsama. Hojiin Yesuus inni guddaan argamuu Hafuura Qulqulluu fi ibiddaatiin fakkeeffama.

“Gonkumaa hin taʼu! Nu warri cubbuuf duune, siʼachi akkamitti cubbuu jala jiraanna? Yookaan nu warri Kiristoos Yesuusitti cuuphamne hundi akka duʼa isaattis cuuphamne isin hin beektanii? Kanaafuu akkuma Kiristoos ulfina Abbaatiin warra duʼan keessaa kaafame sana nus akka jireenya haaraa jiraannuuf cuuphaadhaan duʼa isaa keessatti hirmaannee isa wajjin awwaalamne.” (Roomaa 6:2–4).

Cuuphaan bishaanii qalbii jijjiirrannaa fayyisu fiduu hin dandaʼu; Hafuurri Qulqulluun garuu humnaan nu amansiisa, ofii keenya isa gadadamaa murtii malu nuuf mulʼisa, fannoo keessatti abdii dhiifamaa nuuf kenna, waadaa jireenya bara baraa isa nuuf hin malle nuuf mirkaneessa. Kun hojii Waaqayyooti. Cuuphaa bishaanii fi aadaa qofa irratti yoo hirkanne, hojii Waaqayyo jireenya keenyaaf hojjetu guutummaatti dhabna. Yesuus “Hafuura Qulqulluu fi ibiddadhaan isin cuupha”; kunis dhalachuu jireenya hafuuraa argisiisa.

Kiristaanonni dhiifama qofa hin argatan; garaa fi jireenya haaraa, fedha qulqulluu fi kaayyoo Waaqayyootiin sochoʼu, argatu. Kanaaf fayyinni mataan isaa fi jireenya fayyinaa jiraachuun guutummaatti ayyaana Waaqayyoo karaa Hafuura Qulqulluu irratti hundaaʼa. Jijjiiramoonni irraa dhufan buʼaa hedduu qabu; boodarra isaan ilaalla. Humnii fi kaayyoon isaanii inni yeroo hundumaa jiru garuu dhugoota Hafuura Waaqayyoo nu keessatti hojjetu wajjin kallattiidhaan walqabatan irraa dhufa.

Jechi “ibidda” Hafuura Qulqulluu wajjin HoE 2:3, 19 keessatti walqabate, cuuphaan “Hafuura Qulqulluu fi ibiddaa” Phenxeqosxeetti taʼe sun taatee addaa fi yeroo tokko qofa waan tureef, boodarra Hojii Ergamootaa keessatti hin fayyadamne. Haa taʼu malee, amanaan hundi hojii hafuuraa akka baqaqsanii hodhuutti gadi fagoo taʼe kana Hafuura irraa jireenya isaa keessatti barbaada; hojii gara qalbii jijjiirrannaatti isa fidu, jireenya haaraatti isa galchu, akkasumas Waaqayyo jireenya haaraa ijoollee Isaa kunuunsuu akka itti fufu waadaa taʼu.

Cuunfaa

Amanaan dhugaan Hafuura Waaqayyoo irraa dhalachuu haaraa argata. Jalqabarratti yeroo baayʼee hubatamuu baatus, Hafuurri Waaqayyoo fedha Waaqayyoo raawwachuuf jajjabina, nageenya, geggeessummaa fi humna dabalaa dhufu fida.