B. Ergaawwan Keessatti Deebiʼanii Dhalachuu Hafuuraa

Ergaawwan keessatti jechi hiika balʼaa qabu “deebiʼanii dhalachuu” jedhu dhalachuu hafuuraa ilaalchisee yeroo kudhan fayyadama. Kun hubannaa keenya waaʼee dhalachuu hafuuraa jabeessee, jireenya Kiristaanaa keessatti hojii isaa balʼisa.

• Pheexiros yeroo lama gahee guddaa Waaqayyo saba Isaa filachuu fi humneessuu keessatti qabu dubbata (1 Pheexiros 1:3, 23).

“Waaqaa fi Abbaan Gooftaa keenya Yesuus Kiristoos haa eebbifamu! Inni araara isaa guddaa sanaan, warra duʼan keessaa kaʼuu Yesuus Kiristoosiin abdii jiraataadhaaf lammata nu dhalche;” (1 Pheexiros 1:3).

Waaqayyo “deebiʼee akka nu dhalatu godhe.” Waaqayyo, Uumaan addunyaa qaamaa qofa utuu hin taʼin addunyaa hafuuraas, karaa Hafuuraatiin jireenya hafuuraa gara jiraachuutti waama. Gooftaan wantoota hundumaa kaʼuuf Sababa Guddaa dha; akkasumas akka haadha dhalachuu hafuuraa keessatti hojjeta.

“Isin karaa dubbii Waaqaa isa jiraatuu fi cimee dhaabatu sanaatiin sanyii hin badne irraa lammata dhalattan malee sanyii badu irraa miti.” (1 Pheexiros 1:23).

Dhalachuun haaraan “Dubbii Waaqayyoo isa jiraataa fi bara baraan jiraatu” irraa dhufa. Kanaaf Hafuurri Qulqulluun yeroo hundumaa akka Dubbii Waaqayyoo, Kitaaba Qulqulluutti nu qajeelcha. Hafuuraan guddachuu yoo barbaanne, Caaffata Qulqulluun of sooruu qabna. Sagalee Waaqayyoo adda baasuuf seerri jalqabaa amantoonni fayyadamuu qaban, wanti dhageenyu Caaffata Qulqulluu wajjin wal simuu isaa ilaaluu dha.

• Phaawulos yaada dhalachuu haaraa fayyadamuudhaan karaa namni jireenya Waaqayyoo itti argatu cimsee ibsa (Galaatiyaa 4:23, 29).

“Yeroo sana ilmi akka fedhii fooniitti dhalate sun ilma humna Hafuuraatiin dhalate ariʼate. Amma illee akkasuma.” (Galaatiyaa 4:29).

Dhalachuun jalqabaa jireenya hojii yookaan buʼaa namaa, jechuunis jireenya foonii, bakka buʼa; kunis amantii sirna namaa fi nageenya sobaa fida. Dhalachuun lammaffaa, jechuunis Hafuura irraa dhalachuun, waadaa hojii Waaqayyo nu keessatti hojjetuun dhufa. Hafuurri akka amannuuf amantii nuuf kenna.

• Yohannis jireenya hafuuraa isa uumamaan dhalachuu hafuuraa irraa kaʼu cimsee ibsa (1 Yohannis 2:29; 3:9; 4:7; 5:1, 4, 18).

“Namni Waaqa irraa dhalate kam iyyuu waan sanyiin Waaqaa isa keessa jiraatuuf cubbuu hojjechuutti hin fufu; inni waan Waaqa irraa dhalateef cubbuu hojjechuu hin dandaʼu.” (1 Yohannis 3:9).

Waaqayyo irraa yoo dhalanne, uumama qulqulluu Waaqayyoo qooddanna; waan gaarii jaallanna, waan hamaa irraa fagaanna. Uumamni hafuuraa amanaa dhugaa wantoota Waaqayyoo jaallata; amma uumama Waaqayyoo waan qooduuf wantoota foonii jibba. Jechi “Waaqayyo irraa dhalate” jedhu yeroo lama fayyadameera: inni jalqabaa amanaa ibsa; inni lammaffaan immoo sababii inni yookaan isheen cubbuu keessatti itti hin fufne ibsa.

“Yaa michoota, jaalalli kan Waaqaa waan taʼeef kottaa wal jaallannaa. Namni jaallatu hundi Waaqa irraa dhalate; Waaqas ni beeka.” (1 Yohannis 4:7).

Warri Hafuura Waaqayyootiin haaromfaman dirqamaan wal jaallatu; Waaqayyoonis beeku. Yohannis duraan uumama qulqulluu haaraa isa hammina jibbu cimsee ibse; asitti immoo gama biraatiin uumama jaalala Waaqayyoo dubbata. Ijoolleen Isaa uumama jaalala Waaqayyoo waan qooddataniif, uumamni sun amala ofittummaa keessa akka hin jiraanne godha.

Cuunfaa

Ergamoonni jechoota Yesuus irratti ijaaranii, warri hafuuraa akka taʼan dubbatan deebiʼanii waan dhalatanii fi uumama qulqulluu Waaqayyoo waan qooddataniif jireenya isaanii keessatti akka mulʼisan gaafatu. Namni Waaqayyo irraa dhalate akka Abbaa isaa, Gooftaa, jiraata. Jecha harʼaatiin, “Abbaa fakkaata ilmi.” Phaawulos ergamaan karaa biraatiin akkana jedha:

“Isin akka xalayaa Kiristoos, buʼaa tajaajila keenyaa taatan ifa; xalayaan kunis qalamiidhaan utuu hin taʼin Hafuura Waaqa jiraataatiin, gabatee dhagaa irratti utuu hin taʼin gabatee garaa namaa irratti kan barreeffamee dha.” (2 Qorontos 3:3).

Dhalachuun hafuuraa buʼaa hedduu qaba; ergamoonni isaan keessaa sadii ibsu.

• Pheexiros—madda: Akkuma haati mucaa deessu, Waaqayyo jireenya hafuuraa keenya dhalcha.
• Phaawulos—karaa: Dhalachuu haaraa hojii keenyaan osoo hin taane waadaa Waaqayyootiin arganna.
• Yohannis—buʼaa: Amantoonni jireenya isaanii irraa ija kaayyoo Waaqayyoo wajjin wal simu eegu qabu.