D. Hafuura Qulqulluutiin Chaappeffamuu

2 Qorontos 1:21–22

Jechi “Hafuuraan chaappeffamuu” jedhu siʼa sadii fayyadameera (Efesoon 1:13; 4:30; 2 Qorontos 1:22). Jechi “chaappeffame” jedhu mallattoo aangoo, yeroo baayʼee shamʼaa baqfame irratti sanada tokko irratti godhamu, kan qabiyyee sanada sanaa hojii irra oolchu wajjin wal fakkaata. Fakkeenyaaf, mootichi sanadi tokko kan isaa taʼuu fi namni kam iyyuu isa tuquuf ija jabina qabaachuu akka hin qabne argisiisuuf chaappaa isaa irratti gochuu dandaʼa. Waaqayyo Hafuura Isaatiin saba Isaa chaappeesseera. Kanaanis jireenyi isaanii dhiiga Gooftaan dhiqamee kan Isaa taʼuu labsaa, Seexanni isaan tuquu akka hin qabne akeekkachiisa.

“Isinis dubbii dhugaa jechuunis wangeela fayyina keessanii dhageessanii Kiristoositti amantanii, Hafuura Qulqulluu waadaa galame sanaan chaappeffamtan;” (Efesoon 1:13).

“Hafuura Qulqulluu Waaqaa kan guyyaa furamaatiif ittiin chaappeffamtan sana hin gaddisiisinaa.” (Efesoon 4:30; akkasumas Mulʼata 7:5, 8; 9:4).

“Egaa kan akka nu isin wajjin Kiristoositti jabaannee dhaabannu godhuu fi kan nu dibe Waaqa; innis chaappaa nutti chaappessee, qabdii Hafuura Qulqulluu garaa keenya keessa kaaʼe.” (2 Qorontos 1:21–22).

Hojiin Waaqayyo Hafuura Isaatiin saba Isaa keessatti hojjetu itti fufiinsaan raawwatama. Jechi “akka nu isin wajjin Kiristoositti jabaannee dhaabannu godhu” (lakkoofsa 21) jedhu, taateewwan Hafuuraa yeroo darbe raawwataman sadii irratti hundaaʼa; chaappeffamuun kunis isaan keessaa tokko dha.

• (1) “Kan nu dibe Waaqa” (lakkoofsa 21)
• (2) “Innis chaappaa nutti chaappessee” (lakkoofsa 22; Mulʼata 7:5, 8; 9:4)
• (3) Innis “qabdii Hafuura Qulqulluu garaa keenya keessa kaaʼe” (lakkoofsa 22).

Qabxiileen (2) fi (3) taatee tokko—hojii Hafuuraatiin jireenya keenya Isaaf mirkaneessuu—jedhamanii ilaalamu.

Gabaabumatti

Akkuma Hafuurri Yesuusin dibe, saba Isaa hundumaas ni diba. Sabni Waaqayyoo yeroo tokko Hafuuraan akka qabdiitti chaappeffama; kunis gara raawwii eebba Waaqayyoo isa fagoo fi caalaatti badhaadhaa taʼetti nu qajeelcha. Garuu hojii Hafuuraa isa yeroo ammaa waldaa Waaqayyoo uumee Isaaf dhiheessu hin dagannu.